التخطي إلى المحتوى
عتاب المغنية السعودية واحتفال جوجل بها اليوم 30-12-2018

النهاردة موضوعنا عن عتاب , عتاب دي كانت مطربة مشهورة لا مش مشهورة وبس دي كانت من اشهر المغنيات اللى بتغني فى الافراح والمناسبات السعيدة فى السعودية ومش كدا وبس لالا دي كمان مثلت الاغنية السعودية ايوااا مثلتها لانها كانت نجمه استعراضية ممتازة .

ايه قصتها طيب يعم عتاب دي واتولدت فين .. اهدي عليا انا هقولك كل حاجة ..

عتاب دي كانت من مواليد مدينة الرياض اللى هي عاصمة السعودية ,, موهبه اكتشفها الفنان الكبير طلال مداح والكلام دا كان فى سنة 1960 وكان عمر مطربتنا عتاب فى الوقت دا 13 سنة .. فنانا الكبير طلال مداح قدملها اغنيات سجلتها فى دولتين .. السعودية ولبنان..

وفى سنة 1792 ابتدت عتاب تتفرغ بالفعل للفن , ازاي يعم عملت ايه يعني .. عملت ثنائي جامد اوي فى الجلسات الفنية مع الفنان المميز حيدر فكري .. والسبب اللى نقدر نقول ان شهرتها عليت اوي وبقت مشهورة علي مستوي العالم العربي كلو لما قام عم الكل العندليب الاسمر عبد الحليم حافظ بتقديمها فى حفله من الحفلات بتاعته اللى كان بيعملها مصر والكلام دا كان فى بداية السبعينات الميلادية.

جت سنة 1980 وجت عتاب لمصر بس مبدأتش علي طول ابتدت من سنة 1985 لما غنت اغنيتها اللى من تلحين الفنان فوزي محسون اللى اسمها جاني الأسمر .. جاني الاسمر جاني .. وافتكر زماني. وبعد ما نساني .. جاني .. بس بس صوتك وحش .. حاضر ..

هنا بقي نسأل ليه الفنانة عتاب جت مصر واتشهرت هنا ؟؟ مهي مولودة فى السعودية ليه مغنتش هناك واتشهرت هنا .. هقولك يعم الفصيح .. الفنانة عتاب كانت تعتبر أول سيدة سعودية تتشهر بغناها الاستعراضي برا السعودية ودا اللى خلي الملك خالد يصدر قرار انو يبعدها خالص عن السعودية .. وهنا بقي اختارت عتاب مصر تكمل مسيرتها فيها .. أحبيبتي أمصر ..

وفعلا جت عتاب مصر مع جوزها محب فاورق عبد الصبور وكان باحث مالي فى وزارة الداخلية المصرية سابقا وكان وقتها مقيم فى السعودية .. بس هيسيب مراتو لوحدها يعني نزل معاها وكلمو حياتهم سوا ..

ومن هنا كملت فنانتنا عتاب مشوارها فى الطرب والغنا من دولة الفن .. لما اتعاونت مع الملحن محمد الموجي فى اغنيتها .. فك القيود .. لالا مش هغنيها خلاص .. وعملت اغاني كتيره تانيه مع ملحنين مصرين تانين كتير

الفنانة عتاب بقي اه سابت السعودية بس مساببتش لهجتها .. لغايه لما النقاد قالو عنها انها فرضت لهجتها السعودية فى مصر وهو السبب اللى خلاها تحقق شهرة عربية كبيرة وهي متمسكة بلهجتها السعودية .. وكانت عتاب السبب في انها تفتح مجال كبير لظهور اصوات نسائية تانيه كتير من الخليج

وشاركت عتاب فى تقديمها لبرنامج كان اسمو .. جلس طرب .. كان بيتذاع علي قناة اوربت زمان مع الشاعر الكويتي المشهور بدر بورسلي .. وبعدها فى استفتاء عملته مجلة صوت الغناية فازت مطربتنا عتاب بكاس أفضل مطربة خليجية , وخدت لقب .. مطربة فى استفتاء لجريدة كان اسمها الاعتدال السورية وكانت بتصدر فى ولاية نيوجيرسي فى الولايات المتحدة الامريكية والكلام دا كان فى سنة 1989 .. السنة دي اللى انا اتولدت فيها علي فكرا .. بس ياض .. اسف خلاص ..

عاشت مطربتنا عتاب فى مصر عشررررين سنه لغايه لما سنة 2003 قررت انها تسافر لدولة الامارات بنيه انها تستقر وفى نفس الوقت تكون بردو قريبه من امها اللى معاها الجنسية الاماراتيه ..

وفى السنوات الاخيرة عاشت عتاب فى صفوف المحرومين مقتنعه جدا باللي قدمتو وفرحانه بيه وبحب الناس ليها .. زارت السعودية اخر مرة قبل ما تتوفي بشهور اتعالجت فى احد المستشفيات فيها وبعدها جت لمصر تاني واللى اتوفت بعد ما وصلت لمصر بيوم واحد بعد معانتها الطويلة مع مرض السرطان وكان دا فى 19 اغسطس سنة 2007 عن عمر 59 سنة .. وادفنت هنا في مصر في مقابر الاسرة اللى في مدينة 6 اكتوبر .. واختفي بوفاتها احلي تراث شعبي قديم ..

عن الكاتب

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *